සුර්ය නමස්කාරය Surya Namaskara

සූර්ය නමස්කාරය

                                       සුර්ය නමස්කාරය යනු එකකින් එකකට හුවමාරු වන යෝගාසන කීපයක් අනුපිලිවෙලට පවත්වා සිදු කරන සුර්ය වන්දනාවකි. මෙය ඉතා ඈත අතීතයේ පටන් ඉන්දියානු යෝගීන් පුරුදු කරන අභ්‍යාසයකි. මෙහිදී හිරු දෙවියන් වන්දනා කරමින් සුර්යයාගේ ශක්තිය ඉතා හොදින් ශරීරයට අවශෝෂණය වන යෝගාසන කීපයක් අනුපිලිවෙලට පැවැත්වීම සිදු කෙරේ. කුණ්ඩලිනි චක්‍ර අවදි කරගත් පුද්ගලයන් මෙම අභ්‍යාසය සිදු කරන විට ස්වාභාවිකවම චක්‍ර වල ශක්තිය ඉහල යන බව අත්දකින්න ලැබේ. තෙවැනි ඇස විවර කරගත් පුද්ගලයන් තෙවැනි ඇස වැසි ඇති අවස්ථාවක මෙය සිදු කිරීමෙන් ස්වාභාවිකවම තෙවැනි ඇස විවර වන බව අත්දකින්න ලැබේ. මෙලෙස සුර්ය නමස්කාරය කිරීමෙන් තෙවැනි ඇස හෝ වෙනත් කුණ්ඩලිනි චක්‍ර අවදි වන්නේ මිට පෙර එක් වරක් හෝ චක්‍ර අවදි කර ඇති අයට පමණි. අනෙක් පුද්ගලයන්ගේද චක්‍ර වල ශක්තිය රැස් වීම සිදු වුවද එමගින් චක්‍ර සක්‍රිය වීම සිදු නොවේ. සුර්ය නමස්කාරය කිරීමෙන් පළමු වරට චක්‍ර අවදි කිරීම සිදු කළ නොහැක. එක් වරක් හෝ චක්‍ර සක්‍රිය කරගෙන ඇති අය හට චක්‍ර නැවත-අවදිකිරීම (re-activate) සිදුකල හැක.

සුර්ය නමස්කාරය කිරීමෙන් ශරීරයට ඉතාමත් හොඳ ප්‍රාණවත් බවක් ඇති වේ. සුර්ය ශක්තිය කුණ්ඩලිනි චක්‍ර වල රැස්වීමෙන් බොහෝ ශක්ති විෂමතා සමනය වේ. මෙය කළ යුත්තේ ඉර පායාගෙන එන හිමිදිරියේය. සුර්යාලෝකය පායාගෙන එන සූර්යයාගෙන් පිටවන නැවුම් ශක්තිය ලැබෙන කාලයේය. එනම් අලුයම 5.45ට පමණය. සුර්යයා පෙනෙන්නට ඇති ස්ථානයක සිට මෙය සිදු කිරීම වඩාත් සුදුසුය. එහෙත් එය අත්‍යවශ්‍ය නොවේ.



සුර්ය නමස්කාරය චක්‍රීය අභ්‍යාසයකි. මෙහිදී යෝගාසන 12ක් පවත්වන අතර පළමු භාගයේ සිදුකරන යෝගාසන ප්‍රතිලෝම ලෙස අවසාන භාගයේදීද සිදු කරනු ලැබේ. යෝගාසන 12 මෙසේය :

0. දක්ශාසනය
1. නමස්කාරාසන (ප්‍රනාම් ආසන)
2. හස්ත උත්තානාසන
3. හස්තපාදාසන
4. අශ්ව සංචලනාසන
5. පර්වතාසන
6. අෂ්ටාංග නමස්කාර
7. භුජන්ගාසන
8. පර්වතාසන
9. අශ්ව සංචලනාසන
10. හස්තපාදාසන
11. හස්ත උත්තානාසන
12. නමස්කාරාසන

සූර්ය නමස්කාරය

දක්ශාසනය
දක්ශාසනය සුර්ය නමස්කාරයේ අංගයක් නොවේ. එය සූරය නමස්කාරයේ පුර්වකෘත්‍ය ලෙස හැදින්විය හැක. දණහිස් දෙක හා දෙවිලුඹ එකිනෙක ස්පර්ශ වන ලෙස සීරුවෙන් සිටගන්න. පතුල් V අකුරේ හැඩයට තබාගන්න. දෑත් කය දෙපසට හෙලන්න. පපුව ඉදිරියට යොමු කරන්න. හිස නොනමා තබාගන්න.

1.නමස්කාරාසන
දෙඅත් වක්‍රාකාරව ඉහලට ඔසවා හිසට ඉහලදී දෙඅත්ල එක් කර නමස්කාර කරන ඉරියව්වෙන් තබාගෙන ඒ ඉරියව්වෙන්ම පපුව මැදට ගෙන එන්න.


2.හස්ත උත්තානාසන
දෑත් වෙන් කර සෙමින් ඔසවන්න. ඒ සමග ශරීරය පිටුපසට නවන්න. මෙය සිදු කරන අතර හොදින් පපුව පිරි යන ලෙස නාසයෙන් ආශ්වාස කරන්න.

3. හස්ත පාදාසන
දෑත් දිගහැරගෙන සිටිමින්ම ශරීරය ඉදිරියට නවා දෙඅත්ල පොලවේ ස්පර්ශ කරන්න..
නාසයෙන් හුස්ම පිටකරමින් මෙය සිදු කරන්න.

4. අශ්ව සංචලනාසන
දකුණු කකුල පිටුපසට දිගු කරන්න. ඒ සමග වම් කකුල දණහිසෙන් නවා බිමට පහත් වන්න. අත්ල පොලව ස්පර්ශ වන ලෙසම තබාගන්න. හිස කෙලින් කර පිටුපසට නවන්න. ආශ්වාස කරන්න.

5.පර්වතාසන
දෙඅත්ලෙන් පොලව ස්පර්ශ කරමින් සිටින අතර උඩුකය පහලට නවා පිටුපස හා කොන්ද ඉහලට ඔසවන්න. මෙය සිදු කරන අතර හුස්ම කොටසක් පිටකරන්න.

6. අෂ්ඨාංග නමස්කාර
දෙඅත්ල, දෙපතුල්, දෙදනහිස, පපුව හා නිකට යන අංග අට පොලවේ ස්පර්ශ වන ලෙස තබාගන්න. උකුල මදක් ඉහලට ඔසවන්න. උකුළ ඉහලට ඔසවන්න. හුස්ම සම්පුර්ණයෙන් පිටකරන්න.

7. භුජන්ගාසන
උකුල පහත් කර පපුව හා නිකට ඉහලට ඔසවන්න. උඩුකය මදක් පිටුපසට නවන්න. ඉහල බලන්න. ආශ්වාස කරන්න.

8. පර්වතාසන
දෙඅත්ලෙන් පොලව ස්පර්ශ කරමින් සිටින අතර උඩුකය පහලට නවා පිටුපස හා කොන්ද ඉහලට ඔසවන්න. මෙය සිදු කරන අතර හුස්ම පිටකරන්න

9. අශ්ව සංචලනාසන
වම් කකුල පිටුපසට දිගු කරන්න. ඒ සමග දකුණු කකුල දණහිසෙන් නවා බිමට පහත් වන්න. අත්ල පොලව ස්පර්ශ වන ලෙසම තබාගන්න. හිස කෙලින් කර පිටුපසට නවන්න. ආශ්වාස කරන්න.

10. හස්ත පාදාසන
දෑත් දිගහැරගෙන සිටිමින්ම ශරීරය ඉදිරියට නවා දෙඅත්ල පොලවේ ස්පර්ශ කරන්න..
නාසයෙන් හුස්ම පිටකරමින් මෙය සිදු කරන්න.

11. හස්ත උත්තානාසන
දෑත් වෙන් කර සෙමින් ඔසවන්න. ඒ සමග ශරීරය පිටුපසට නවන්න. මෙය සිදු කරන අතර හොදින් පපුව පිරි යන ලෙස නාසයෙන් ආශ්වාස කරන්න.

12. නමස්කාරාසන
දෙඅත් වක්‍රාකාරව ඉහලට ඔසවා හිසට ඉහලදී දෙඅත්ල එක් කර නමස්කාර කරන ඉරියව්වෙන් තබාගෙන ඒ ඉරියව්වෙන්ම පපුව මැදට ගෙන එන්න.


සුර්ය නමස්කාරය සිදු කරන අතර සුර්යයාටත් සුර්ය දෙවියන්ටත් වන්දනා කිරීම සිදුකිරීමෙන් සුර්ය ශක්තිය වඩාත් හොදින් ශරීරයට අවශෝෂණය වේ. ගස්, ගල්, ඉර සඳ ආදියට වන්දනා කිරීමේ පලක් තිබේදැයි ඔබට සිතිය හැක. සුර්යයා යනු සියලු සතුන් හා ශාක ජිවත් කරන ශක්තිය ලබාදෙන ශක්ති ප්‍රභවයයි. සුර්යාලෝකය නොමැතිනම් ශාක වල ප්‍රභාසන්ස්ලේෂණයක් සිදුවන්නේ නැත. එනම් කිසිදු සත්වයෙකුට ආහාර ලැබෙන්නේ නැත. ආහාර යනු සීනි,පිෂ්ටය, ප්‍රෝටීන වැනි රසායනික අණුය. ශාක තුල ආහාර නිපදවීමේ ක්‍රියාවලියේදී සිදුවන්නේ සුර්ය ශක්තිය රසායනික ශක්තිය ලෙස තිර කිරීමයි. ශාක වල ඇති ක්ලොරෝෆිල් වර්ණකය හා තවත් වර්ණක ආලෝක ප්‍රතිග්‍රාහක අණුය. ඒවා සුර්ය ආලෝකය උරා ගෙන ආලෝක ශක්තිය රසායනික ශක්තිය බවට පරිවර්තනය කරයි. එම රසායනික ශක්තිය ආහාර හෙවත් කාබෝහයිඩ්රේට, ප්‍රෝටීන, ලිපිඩ ආදියේ පරමාණු හා අණු අතර බන්ධන ලෙස ගබඩා වේ. ආහාර ජීර්ණය කිරීමෙන් අප සිදුකරන්නේ ආහාර වල ඇති මෙම රසායනික අනු බිඳහෙලා එවිට නිදහස් වන ශක්තිය සෛල වල ක්‍රියාකාරිත්වයට යෙදවීමයි. එනම් අප ඇවිදීමේදී කතා කිරීමේදී හුස්ම ගැනීමේදී වැය කරන්නේ සුර්යයාගේ සිට ශාක වලට ලැබී ශාක වලින් ආහාර වල ගබඩා කල සුර්ය ශක්තියයි. අපගේ හදවත ගැහෙන්නේද, ආහාර ජීර්ණය වන්නේද, සෛල තුල සිදුවන කුඩා ක්‍රියාවලි සියල්ලම සිදුවන්නේද සුර්ය ශක්තියෙනුයි. සුර්යාලෝකය නොමැතිව ශාක හෝ බීජ වර්ධනය වන්නේද නැත. සුර්යයා නොමැති කළ ජීවයක් නැත.

පෙට්‍රෝලියම් දහනය කර අප වැය කරන්නේද සුර්ය ශක්තියයි. පෙට්‍රෝලියම් නිපදවෙන්නේ ආදී කාලින වනාන්තර වල ශාක හා මියගිය සත්ත්ව දේහ පස් වලට යටවී පොලවේ ඉතා ගැඹුරට ගමන් කර අධික පිඩනයට ලක් වීමෙනි. එවිට එම ශාක හා සත්ත්ව කොටස් ඝන ස්වභාවයේ සිට ද්‍රව ස්වභාවයට පත් වේ. ද්‍රව බොර තෙල් ලෙස ලැබෙන මෙම පෙට්‍රෝලියම් පිරිපහදු කර විවිද Carbon පරමාණු සංඛ්‍යාවක් සහිත බියුටෙන්, ප්‍රෝපේන්, පෙට්‍රල්, ඩිසල් ආදී පෙට්‍රෝලියම් ඉන්ධන වෙන් කර ගැනේ. මෝටර් රථ හා කර්මාන්ත තුල ඒවා දහනය කිරීමෙන් සිදුකරන්නේ ඒවා තනි ඇති පරමාණු අතර බන්ධන බිද හෙළා එවිට නිදහස් වන ශක්තිය භාවිතා කිරීමයි. එනම් පෙට්‍රෝලියම් ලෙසද අප භාවිත කරන්නේ සුර්ය ශක්තියයි.

ඔබ මෙම ලිපිය බලනා පරිඝනකයේ හෝ දුරකථනය මගින් මෙම අකුරු පෙන්වන්නේද සුර්ය ශක්තිය මගිනි. මෙහි ඇති අකුරු හා රුප දැකීමට ඔබගේ ඇස ක්‍රියාත්මක වන්නේද සුර්ය ශක්තියෙනි. මෙය කියවා එහි අර්ථය ඔබගේ මොළය මගින් තෙරුම්ගන්නේද සුර්ය ශක්තිය මගිනි.

මෙලෙස ජිවය ඇතිකරන ආහාර ඇතිකරන සර්වආකාරයෙන් ශක්තිය ලබාදෙන සුර්යයාට වන්දනා කිරීමෙන් සිදුකරන්නේ සුර්යයාගේ ශක්තිය අප තුලට ඇතුළුවන මානසික දොරටුව විවර කිරීමයි. සුර්ය ශක්තිය ලබාගැනීමටනම් කයද මනසද සුර්ය ශක්තියට විවර කළ යුතුය. කය විවර කරන්නේ සුර්ය නමස්කාරය කිරීමෙනි. සුර්ය නමස්කාරයේ අඩංගු යෝගාසන කිරීමේදී ශරීරයේ ශක්ති ගලා යන මාර්ග වන නාඩි සුවිශේෂී ක්‍රමයකට සකස් වේ. එමගින් සුර්ය ශක්තිය ශරීරය තුලට උරා ගෙන නාඩි තුලින් සිරුර පුරා විහිදී යයි. මනස විවර කරන්නේ සුර්යයාට වන්දනා කිරීමෙනි, සුර්යයා සිතින් පිලිගැනිමෙනි. එමගින් සුර්ය ශක්තිය සිතින් වැළඳගැනීම සිදු කෙරේ. සුර්ය ශක්තිය සිතින් පිළිගැනීම ශක්තිය සිරුර තුලට අවශෝෂණය වීම කාර්යක්ෂම කරයි. චිත්ත තරංග වල ශක්තියට සුර්ය ශක්තිය ආකර්ෂණය කරගැනීමේ හැකියාවක් පවතී. සුර්ය ශක්තිය සිතින් පිළිනොගෙන සුර්ය නමස්කාරය සිදුකිරීම සුලන් රැල්ලක් බිත්තියක වැදී වෙනතක යනවා වැන්නකි. සුර්ය ශක්තිය සිතින් පිළිගෙන සුර්ය නමස්කාරය සිදුකිරීම දෙපසින් හමන සුලන් ධාරා දෙකක් එකිනෙක ගැටී එකිනෙක මුසු වෙනවා වැන්නකි. සුර්ය වන්දනාවෙන් සිදුකරන්නේ චිත්ත ශක්තිය සමග සුර්ය ශක්තිය මුසු කිරීමයි. එවිට ඉතා හොදින් ශක්තිය සිරුර තුලට අවශෝෂණය වේ.

සුර්යයා ස්වභාවික අචේතනික වස්තුවකි. එමනිසා සූර්යයාගෙන් හිතකර බලපෑම්ද අහිතකර බලපෑම්ද පෘථිවියටත් මනුෂ්‍යයන්ටත් පැමිණේ. මෙම අහිතකර බලපෑම් අවම කිරීමට සචේතනික පුද්ගලයෙකු බැදී සිටි. ඒ සුර්ය දෙවියන්ය. සුර්යයාගේ බලපෑම් යාමනය කරන්නේ සුර්ය දෙවියන්ය. සුර්ය දෙවියන්ට වන්දනා කරන්නේ මෙබැවිනි. සුර්ය දෙවියන්ට වන්දනා කරන්නන් හට සුර්ය දෙවියන් ආශිර්වාද කරයි. එතුමන්ගේ ආශිර්වාදය ශක්තිය ලබාගැනීමට උපකාරී වේ. සුර්යයාට හා සුර්ය දෙවියන්ට වන්දනා කිරීමේ පදනම මෙයයි. එය අන්ධ භක්තියෙන් සිදු කරන්නක් නොවේ.

සූර්ය නමස්කාරය

සුර්ය නමස්කාරය සිදු කරන අතර සුර්යයා වන්දනා කරන මන්ත්‍ර මැතිරීමද සිදු කෙරේ. එක් එක් ආසනයේදී ඒවාට අදාළ මන්ත්‍ර මතුරනු ලැබේ. එක් එක් ආසනයේදී මැතිරිය යුතු මන්ත්‍ර පහත පරිදි වේ.

1. නමස්කාරාසන (ප්‍රනාම් ආසන) - ඕම් මිත්‍රාය නමහ
2. හස්ත උත්තානාසන - ඕම් රවයේ නමහ
3. හස්තපාදාසන - ඕම් සුර්යාය නමහ
4. අශ්ව සංචලනාසන - ඕම් භානවේ නමහ
5. පර්වතාසන - ඕම් ඛගාය නමහ
6. අෂ්ටාංග නමස්කාර - ඕම් පූශ්නේ නමහ
7. භුජන්ගාසන - ඕම් හිරන්‍ය ගර්භාය නමහ
8. පර්වතාසන - ඕම් මරීචයේ නමහ
9. අශ්ව සංචලනාසන - ඕම් සවිත්රේ නමහ
10. හස්තපාදාසන - ඕම් අක්‍රාය නමහ
11. හස්ත උත්තානාසන - ඕම් ආදිත්‍යාය නමහ
12. නමස්කාරාසන - ඕම් භාස්කරාය නමහ

වෘක්ශාසනය Vrukshasana

සුර්ය වන්දනාව 

 

හිරු වන්දනාව 

මෙම රූපයේ දැක්වෙන්නේ වෘක්ශාසනයයි. ලංකාවේ බොහෝ දෙනෙකු මේ වන විට වෘක්ශාසනය සුර්ය නමස්කාරය ලෙස වරදවා වටහා ගෙන සිටි. ලෝකයේ ඇති සියලුම දේ අන්ධ භක්තියෙන් රාවණා මත පටවන සමහර පුද්ගලයන් විසින් තමන්ගේ දැනුම අනුව තමන්ට වැටහෙන ආකාරයට යෝග කරුණු සමාජගත කිරීම මෙයට හේතුවයි. සුර්ය නමස්කාරය ලෙස Internet search කල විට වෘක්ශාසනය දකින්න ලැබෙන නිසාත් රාවණා රජු එම ආසනයෙන් සිටිමින් ශිව දෙවියන් වන්දනා කරන චායාරුප තිබෙන නිසාත්, සුර්ය නමස්කාරයේ පවතින ආසන වලට වඩා වෘක්ශාසනය ආකර්ශනීය ලෙස දිස්වෙන නමස්කාර ආසනයක් නිසා ඒ අනුව වෘක්ශානය සුර්ය නමස්කාරය විය යුතුයැයි තමන්ම සිතාගෙන තමන්ම එවැනි මත පැතිරවීමක් මිස වෘක්ශාසනය හා සුර්ය නමස්කාරය අතර සම්බන්ධයක් නැත. Internet ඥානයෙන් යෝග අර්ථ දැක්වීමට යෑමේ ප්‍රතිපලය මෙයයි. වෘක්ශාසනය සිදුකිරීමෙන් සුර්ය ශක්තිය ශරීරගත වන නාඩි විවර වන්නේ නැත.

මෙය අන්ධ විශ්වාසය මත සිදුකෙරෙන අඥාන ක්‍රියාවක් පමණි. සුර්ය නමස්කාරය කිරීමෙන් ලැබෙන ශක්තිය වෘක්ශාසනය කිරීමෙන් ශරීරයට නොලැබේ. වෘක්ශාසනයේ ප්‍රතිපල වන්නේ
- සන්ධි ශක්තිමත් වීම
- අත් පා මෘදු වීම
- උඩුකය මාංශ පේශි සැකසීමෙන් කඩවසම් පෙනුමක් ඇතිවීම
- මානසික ඒකාග්‍රතාව ඇතිවීම
- ශරීරයේ සමබරතාව වැඩිවීම
- පාද වල ශක්තිමත් බව වැඩිවීම ආදියයි.

වෘක්ශාසනය පමණක් සිදු කිරීමෙන් ඉහත සදහන් කල සුර්ය නමස්කාරයෙන් ලැබෙන ප්‍රතිපල කිසිවිටෙකවත් නොලැබේ. වෘක්ෂ + ආසන යනු ගසක ස්වභාවයෙන් සිටින ආසනය යන්නයි. මෙම ආසනයෙන් සිටියදී සිදුවන්නේ පොළවෙන් ශක්තිය ශරීරයට ලැබීම මිස සුර්යාගෙන් ලැබීම නොවේ. යෝග ධර්මය පංච අභිඥා අෂ්ට සමාපත්ති හා කුණ්ඩලිනි ශක්ති ලාභී ඍෂි වරුන් විසින් නිර්මාණය කර මිනිසුන්ට ඉගැන්වූ ධර්මයකි. ඔවුන් ඒවා නිර්මාණය කරන්නේ විශ්වයේ සියලු දේ දිවැසින් ඥානයෙන් දැක අවබෝධ කිරීමෙනි. වෘක්ශාසනය පමණක් කිරීමෙන් සුර්ය ශක්තිය ශරීරයට ලබාගත හැකිනම් සුර්ය නමස්කාර අභ්‍යාසයක් නිර්මාණය කිරීමේ අවශ්‍යතාවක් නැත.

සූර්යනමස්කාරය

 යෝගාසන හා නාඩි ශුද්ධි පිලිබදව පල කල ලිපි වලදී සිරුරේ ශක්ති ගලායන මාර්ග වන නාඩි හා ඒ ආශ්‍රිත ස්නායු වා පිත් සෙම් මගින් අවහිර විය හැකි බවත් එම අවහිරතා නිදහස් වීමට යෝගාසන හා කුන්ඩලිනි භාවනා කිරීමට පෙර සුළු වෙලාවක් Warmup හා Stretching ව්‍යායාම කිරීම සුදුසු බවත් මා සදහන් කලෙමි.
සුර්ය නමස්කාරය හොදින් අධ්‍යනය කල විට ඒ මගින්ද සිරුරේ සියලු කොටස් ඇදීමට ලක්වන stretching ව්‍යායාම සිදුකරන බව දක්නට ලැබේ. නුතනයේ භාවිත වන streching ව්‍යායාම වලදී පවත්වන ඉරියව් වලට බොහෝදුරට සමාන ඉරියව් සුර්ය නමස්කාර ආසන 12 තුල සිදුකෙරේ. ඒ මගින් සිරුරේ නාඩි අවහිර කරන වා පිත් සෙම් දෝෂ පිරිසිදු කර හොදින් සුර්ය ශක්තිය සිරුර පුරා විහිදී යාම සිදුවේ.

ප්‍රාණයාම කිරීමට පෙර සුර්ය නමස්කාරය සිදු කිරීම මගින් ප්‍රාණ ශක්තිය හොදින් සිරුරට අවශෝෂණය කරගත හැක. ප්‍රාණයාම ලිපිය කියවීමට - ( මෙතන ක්ලික් කරන්න ) 

යෝග හා භාවනා ක්‍රම පිළිබඳව තවත් සවිස්තරාත්මකව දැනගැනීමට අපගේ Youtube නාලිකාවට subscribe කර එකතුවන්න :-